"အကူး "

တပ်ထဲ နေခဲ့စဉ်က ဆေးခန်းလိုက်တယ်ဆိုတာ
ခပ်ရှားရှားရယ်
ဆေးခန်းလိုက် စာအုပ်တောင် မရှိဘူး။
ရာသီစာ တုပ်ကွေးလေး၊ ဖျားတာလေးဖြစ်တာလွှဲလို့
ကျန်းမာရေးကောင်းတယ်ပေါ့လေ။

ဟော ခု အိမ်မှာ ခံစားခွင့်နဲ့
အေးအေးလူလူနေတဲ့အချိန်ကြမှ
မိုးကလေးမိတာနဲ့
တုပ်ကွေးဝင်ပြီး အဖျားတွေတက်လို့
ဆေးနှစ်ရက်လောက်ထိုးရတယ်။

ကောင်းပြီးတစ်ရက်ကြတော့လဲ
ညနေစောင်းရေချိုးမှားမိတာ
အပူတက် တက်ပြန်လေရော
ချက်ခြင်းဆေးခေါ်ထိုးယူလိုက်မှ
သက်သာသွားတော့တယ်။

ဒီလိုပါ ဖြစ်တဲ့ညက
ခေါင်းတွေကို အုံခဲပြီး ဘယ်လိုမှ အိပ်မရဘူး။
ရင်ဘတ်ကြီးကလည်း တင်းကြပ်ပြီး
အသက်ရှူများ ရပ်သွားမလားအောက်မေ့မိတယ်။
ဗိုက်ထဲမှာလည်း လေပူတွေထပြီး
ရောဂါတွေ ဗြောင်းဆန်နေတယ်ပေါ့ဗျာ။

ဒီလိုအချိန်မှာ အတွေးလေးတစ်ခုဝင်လာမိတယ်
"ငါ ဒီလိုအချိန်မှာ သေသွားခဲ့ရင် ဘယ်လိုလုပ်မလဲ
ရောဂါဆိုတာ ပြောလို့ရတာမဟုတ်သလို
သေခြင်းဆိုတာ ဒီနေ့ နောက်ရက် ချိန်းထားတာမှ
မဟုတ်တာလေ သေသွားရင် .."

"သေသွားရင်..
မိန်းမနဲ့ကလေးကတော့ ကသီမှာပဲ
ပိုက်ဆံထုတ်ဖို့ပြုဖို့ ဘယ်လိုလုပ်မလဲ
ကလေးကလဲ ကျောင်းစတက်တာ ဆိုတော့
တစ်နေရာစီ သွားလိုက် လာလိုက်နဲ့
ဒုက္ခတော့ ရောက်တော့မှာပဲ "

"အေးလေ..
ငါတောင် သေသွားပြီးမှ ဘာလုပ်နိုင်ပါဦးမလဲ
ရှင်နေတဲ့သူက ကိုယ့်ထက် ကုသိုလ်ကံ ကျန်နေသေးလို့
ရှင်သန် လှုပ်ရှားနေရဦးမှာ ရှင်နေတဲ့သူအတွက်
ငါ ဘာများတွေးပူလို့ ဘာတတ်နိုင်ဦးမှာပါလဲ "

အဲဒီလိုအတွေးဝင်လာမိတော့
"အဟက်..ဟက်…ဟက် "
ကိုယ့်ကိုယ်ကို လှောင်ရယ်လေး ရယ်လိုက်မိတာပါ။

ရယ်တော့လည်း ရယ်ရသား
ခုနေချိန်များ ဖြုတ်ခနဲ သေသွားကြည့်
ကျွတ်မယ် လွှတ်မယ်ထင်လား…
ဇနီးအစွဲ သမီးအစွဲနဲ့
အိမ်မြှောင်ပဲ ဖြစ်မလား၊ တောက်တဲ့ပဲ ဖြစ်မလား
ပြိတ္တာပဲ ဖြစ်မလား မသိဘူး..

ဟုတ်တယ်လေ..
ကိုယ်သေသွားပြီး ကိုယ်သွားရမဲ့
နောက်ဘ၀ "လားရာ "က
ဘယ်ဝယ် ဘယ်သောင်ဆိုက်မယ်မှန်းမသိပေးပဲ
ကျန်ခဲ့သူအတွက် တွေးပြီးတောင် ပူပင်နေသေးတာကိုး။

စဉ်းစားကြည့်မိပြန်တော့
မွေးကတည်းက သူများထက် လှချင်
သန်မာချင်၊ ကျန်းမာချင်၊ တော်ချင်၊ တတ်ချင်
လုပ်ချင်၊ ကိုင်ချင်တဲ့
တယုတယ နေ့စဉ် ပြုပြင်နေတဲ့
ကိုယ့် ဒီခန္ဓာကိုယ်ကြီးကိုတောင်
သေသွားပြီဆိုရင် ထားခဲ့ရတော့မှာလေ..
ကိုယ့်ခန္ဓာတောင် ကိုယ်မပြုမပြင်နိုင်ပါဘဲ
သူတစ်ပါးအတွက် တွေးပူနေရတယ်ဆိုတာ
ရယ်စရာ မကောင်းပေဘူးလား..။

အမှန်တော့ စိုးရိမ်စရာ ကောင်းလှတယ်ဆိုရင်
ပိုမှန်မယ်ထင်ပါရဲ့။
ကိုယ်ကူးရမဲ့ ဟိုဘက် အကူးက
ကောင်း၏ ဆိုး၏ မသိ
ပြီးတော့ ကိုယ်တိုင် အာမခံချက်မှ
မပေးနိုင်အောင် ကိုယ်ကဘာမှ ကျင့်ကြံထားတာလဲ
ရှိမှမရှိပဲလေ…။

ဒီတော့
ဘယ်လိုပြောရမလဲ ဆိုရင်တော့
ဟိုဘက်အကူးအတွက်
ကိုယ်စီးမဲ့ သင်္ဘောကောင်းကောင်း
လှေကောင်းကောင်း တည်ဆောက်ထားနိုင်ပြီဆိုရင်တော့
ဇနီးအရေး..သမီးအရေး
အေးအေးဆေးဆေး လုပ်ပေတော့
အင်း..ပေါ့လေ..
ဇနီးအရေး…သမီးအရေး…
ဟုိုအရေး…ဒီအရေး တွေက
ပိုပို အရေးကြီး ကြီးနေတော့
စက္ကူသင်္ဘောတောင် မခေါက်နိုင်တဲ့အခြေအနေ
ဆိုတော့ကား…

"အဟက်..ဟက်…ဟက် "လို့ပဲ
ကိုယ့်ကိုယ်ကို လှောင်ရယ်လေး ရယ်လိုက်မိတာပါ။

----------------

မေတ္တာဖြင့်
မောင်ပိုင်
၂၇-၅-၂၀၁၅