အမုန်းခံ ရေးတဲ့စာ

 Image may be NSFW.
Clik here to view.

Yin Yin Hnoung
ဒီစာကို အမုန်းခံရေးပါမယ်။
မကျေနပ်သူများဆဲချင်ဆဲသွားကြပါ။ဘလော့ချင်ဘလော့သွားကြပါ။
ဒါပေမယ့် ဒီစာကိုဖတ်ဖို့ ဆုံးဖြတ်လိုက်ချိန်မှာ သင့်ဦးနှောက်ကို သင်နဲ့ အတူ တပါတည်းဆောင်ယူပြီးမှဖတ်ပါလို့ ကြိုတင်မေတ္တာရပ်ခံပါရစေ။

ဝံသာနုစီးပွားရေးကို အားပေးကြဖို့ လှုံ့ ဆော်မှုတွေဟာ အခုမှပေါ်ပေါက်လာတာမဟုတ်ပါဘူး။
သီပေါမင်းပါတော်မူပြီး ၁၉၀၀ခုနှစ်ပတ်ဝန်းကျင်က မန္တလေးမှာ ဓာတ်ရထားပြေးဆွဲမှုတွေ စတင်ပါတယ်။
ပိုင်ရှင်ကတော့ အိန္ဒိယအမျိုးသား မနန့်ဂျီ ဆိုသူဖြစ်ပါတယ်။
မြန်မာလျှာနဲ့ အခေါ်ရလွယ်အောင်ပြောင်းလိုက်တော့ မနှင်းဆီဓာတ်ရထားဖြစ်လာပါတယ်။
အဲ့ဒီမှာ မျိုးချစ်စိတ်ပြင်းထန်သူ မြန်မာအမျိုးသားအချို့ က
မြန်မာလူမျိုးပိုင် သယ်ယူပို့ ဆောင်ရေးစနစ်တီထွင်ဖို့ အကြံဖြစ်လာကြတယ်။
ဒီလိုနဲ့  မြန်မာလက်သမားများတီထွင်ကြံဆပြီး ရာလေး ကျားစီးစက်ဘီးကို ဘေးတွဲတပ်လိုက်ရာက ဆိုက်ကားဖြစ်လာပါတယ်။
ဆိုက်ကားမှာ ဘာညာသာရကာလှုံ့ ဆော်မှုစာတန်းတွေမချိတ်ဆွဲပေမယ့် ဒါဟာ မြန်မာအမျိုးသားပိုင်မှန်းသိတဲ့အတွက် အားပေးကြရာက တွင်ကျယ်လာပါတယ်။
မနှင်းဆီဓာတ်ရထားကတော့ သံလမ်းရှိရာပဲပြေးဆွဲနိုင်တဲ့အတွက်ံအလုပ်မဖြစ်တော့ဘဲ
ချောင်ကြိုချောင်ကြားတိုင်း လွယ်လွယ်ဝင်ရောက်နိုင်တဲ့ ဆိုက်ကားက နေရာယူလိုက်ချိန်မှာတော့ မနှင်းဆီဓာတ်ရထား ခေတ်ပျောက်သွားပါတော့တယ်။

ဒါပေမယ့် ဝံသာနုစိတ်တစ်ခုတည်းနဲ့ စီးပွားရေးတစ်ခုဟာ ကြာရှည်မခံနိုင်ပါဘူး။
ရေရှည်မှာ စွမ်းဆောင်ရည်သာတဲ့ပြိုင်ဘက်နဲ့ တွေ့ ရင် ရှုံးနိမ့်တတ်ပါတယ်။
အခုဆို နောက်ဆုံးမင်းနေပြည်တော်ဖြစ်ခဲ့တဲ့မန္တလေးမှာ တချိန်က တွင်ကျယ်ခဲ့တဲ့ စက်ဘီး ဆိုက်ကားတွေအစားဆိုင်ကယ်က နေရာယူလာပါပြီ။
ဘယ်လောက်ပဲ ဝံသာနုစိတ်ရှိသူလို့ပြောပြော လက်ရှိမှာတော့ ဆိုင်ကယ်က ဆိုက်ကားထက် ပိုတွင်ကျယ်တယ်ဆိုတာ လက်ခံရတော့မှာပါ။

ဒီလိုပါပဲ။
အခုချိန်ဟာ မြန်မာနိုင်ငံရဲ့ တောက်ပတဲ့အနာဂတ်ကို အရှိန်အဟုန်ပြင်းပြင်းနဲ့စတင်နေချိန်လည်းဖြစ်ပါတယ်။
၂၀၁၃မှာ SEA Gameပြိုင်ပွဲ
၂၀၁၄မှာ ASEAN ဥက္ကဌရာထူး
၂၀၁၅မှာ ASEAN FREE TRADE AREA စတင်တော့မယ်။
နိုင်ငံတကာနဲ့ အများကြီးဆက်ဆံရတော့မယ်
ဘာတွေအဆင်သင့်ဖြစ်ပြီလဲ တို့ မြန်မာ။

ဂျပန်လိုမျိုး ကားကို အဓိကပို့ ကုန်လုပ်ဖို့ 
ကိုးရီးယားလို အီလက်ထရောနစ်ပစ္စည်းကို အဓိကပို့ ကုန်လုပ်ဖို့ 
အဲ့လိုအခြေအနေမျိုးရောက်အောင်တော်တော်ကြိုးစားရပါလိမ့်မယ်။
Made in MYANMAR ဆိုတဲ့တံဆိပ်တစ်ခုကို နိုင်ငံတကာမှာ နေရာတစ်နေရာရဖို့ ဆိုတာ ၉၆၉တံဆိပ်ကပ်ရုံနဲ့ဖြစ်လာမှာမဟုတ်ပါဘူး။
၇၈၆လိုအော်နေရုံနဲ့လည်းမပြီးပါဘူး။
၉၆၉နဲ့ ၇၈၆ဆိုတဲ့ comparative ဆန်ဆန် ဘာသာရေးဗန်းပြတဲ့စီးပွားရေးနဲ့တော့ အလုပ်မဖြစ်ပါဘူး။ နိုင်ငံတကာနဲ့ competitiveယှဉ်ပြိုင်ရမယ့် စီးပွားရေးခေတ် ဖြစ်လာရပါတော့မယ်။

ကုန်ပစ္စည်းတစ်ခုရဲ့ အရည်အသွေးဟာ ဘာသာရေးတံဆိပ်အောက်မှာကပ်ရုံနဲ့  နိုင်ငံတကာ စံညွှန်းမီသွားမှာမဟုတ်ပါဘူး။
အများကြီးကြိုးစားရပါလိမ့်မယ်။
အများကြီးအားထုတ်ရပါလိမ့်မယ်။
ကိုယ့်ကုန်ပစ္စည်းကို ဘာသာရေးတံဆိပ်အောက်ကနေရောင်းချနေခြင်းထက် တကယ်ကို အဆင့်အတန်းမီမီ အရည်အသွေးပြည့်ပြည့်ထုတ်ကုန်တွေနဲ့ နိုင်ငံတကာကိုထိုးဖောက်ရတော့မယ့် အချိန်ရောက်နေပါပြီ။

တရုတ်နိုင်ငံကနေ ဆိုင်ကယ်တွေ တင်သွင်းလာတော့ (အောမီးသောဖော)ဆိုတဲ့စာတန်းတွေ ကပ်ပြီး ဝင်လာတာမဟုတ်ပါဘူး။
သယ်ယူပို့ ဆောင်ရေးမှာ ဆိုက်ကားထက်ပိုလျင်မြန်တဲ့အတွက် ဆိုက်ကားတွေ အလိုလိုနေရာပျောက်ပြီး မန္တလေးဟာ ဆိုင်ကယ်မြို့ တော်ကြီးဖြစ်လာတာပါ။
ဒီအချက်ကိုသတိမူကြစေချင်ပါတယ်။

ငါတို့ မြန်မာတွေ မျက်စိပွင့်ကြပါတော့။
နားဖွင့်ကြပါတော့။
ဘာသာရေးမှိုင်းတွေအောက်က ရုန်းထွက်ကြပါတော့။
အိမ်ကြက်ချင်း အိုးမည်းသုတ်ထားတော့ တခြားခြံကကြက်တွေမြင်ရင် ရယ်စရာဖြစ်မနေပေဘူးလား။
အခုပြောတဲ့စာကိုလည်း လက်ခံချင်မှလက်ခံပါ။
ကိုယ်ပိုင်ဦးနှောက်နဲ့ ပဲ စဉ်းစားဆုံးဖြတ်ကြပါ။
များများတွေးလို့  ဝေးဝေးကြည့်တတ်ကြပါစေလို့ ပဲ ဆုတောင်းရင်း ဒီစာကို နိဂုံးချုပ်လိုက်ပါတယ်။