by Ter Tee on Sunday, March 10, 2013 at 4:43pm ·
ရွှေည၀ါဆရာတော် ၊ ဆရာတော်ဦးဝီရသူ ၊ မကွေးဆရာတော်ရှင်ပါမောက္ခတို့မှ မအူပင်မြို့နယ် လယ်ယာမြေပဋိပက္ခနှင့် ပတ်သက်ပြီးသက်ဆိုင်သူများနှင့် တွေ့ဆုံဆွေးနွေးခြင်းကို ဖော်ပြလိုက်ပါသည်။
- The Messenger Journal
ရွှေည၀ါ ဆရာတော်
တရားနည်းလမ်းသုံးပြီးနှစ်ဦးနှစ်ဖက် နောက်ထပ်ရန်ငြိုးရန်စတွေနဲ့ မီးပွားတွေထပ်မကူးဖို့ အဲဒါတွေလေ့လာပြီးတော့ ရည်ရွယ်ချက်နဲ့ ဘုန်းကြီးတွေလာခဲ့တာပါ။ အဲဒီလို ကြားရတာဆွမ်းစားရတာ သိပ်မဖြောင့်လို့ ၊ အိပ်ရတာ ဘာပဲပြောပြော ဒကာ ၊ ဒကာမတွေအတွက် ဘုန်းကြီးတို့တိုင်းပြည်မှာက အလုပ်သမားအရေးတွေ ၊ လယ်သမားအရေးတွေ ၊ ဘာသာရေးတွေကလည်း ဆူနေတဲ့အချိန် ၊ ကျုပ်တို့ကလည်း အမျိုးသားရေးစိတ်နဲ့ဘာသာရေးမှာ တခြားဘာသာဝင်တွေနဲ့ ပြဿနာမဖြစ်အောင် ၊ ဒေသတွင်းတွေမှာ ကိုယ့်စည်းကိုယ် လုံလုံခြုံခြုံကာဖို့ ၊ ကိုယ့်ဘာသာဝင်တွေကို တိုင်းပြည် ၊ လူမျိုးဘာသာ သာသနာ မပျောက်အောင်လုပ်နေရပါတယ်။ ဒါပေမယ့်သူတပါးဘာသာကို အကြမ်းမဖက်ဘူး။ ကျုပ်တို့ဘာသာကိုပဲ လုံခြုံအောင် ကိုယ့်အမျိုးကောင်းသမီးတွေကို အမျိုးသားရေးစိတ် ၊ မျိုးချစ်စိတ်ရှိဖို့လိုက်ဟောနေတယ်။ အခုတောင်သူလယ်သမားအရေးပေါ်လာတော့ ကိုယ့်ဒကာ ၊ ဒကာမအချင်းချင်း မဖြစ်စေချင်ဘူး။ အခုလိုဖြစ်သွားတော့ စိတ်မကောင်းဘူး။ လက်ပံတောင်းတောင်တုန်းကလည်း စိတ်မကောင်းဘူး။ အခုလိုထပ်ဖြစ်တော့လည်း စိတ်မကောင်းဘူး။
ဦးညီညီဝင်း ( မြို့နယ်အုပ်ချုပ်ရေးမှုး )
တပည့်တော်တို့ ပဋ္ဋိပက္ခဖြစ်တဲ့နေရာကတော့ အခုနေရာက မိနစ် နှစ်ဆယ်လောက် ထပ်လျှောက်ရပါတယ်။ လက်ရှိ အနေအထားမှာတော့ တပည့်တော်တို့ဘက်ကလည်း အားလုံးသင့်သင့်မြတ်မြတ်ပေါ့။ လက်ရှိကတော့ ကန်ပေါင်ပေါ်မှာလည်း မရှိပါဘူး။ လယ်ကွင်းပေါ်မှာပေါ့။ မနက်ခင်းကတော့ ပုံမှန်ဆိုရင် ၁၀ နာရီလောက် ဆိုရင်တော့ ရောက်ရှိလာပါတယ်။ ခရိုင်အုပ်ချုပ်ရေးမှုးနဲ့ မြို့နယ်အုပ်ချုပ်ရေးမှုးတွေလည်း ရှိနေပါတယ်။ တပည့်တော်လည်း ဒီမြို့ပေါ်မှာ အားကိုးအားထားတွေရော ၊ ရပ်မိရပ်ဖတွေရော ၊ အသင်းအဖွဲ့တွေရော။ ဒီကိစ္စအေးအေးချမ်းချမ်းဖြစ်ဖို့ အကူအညီတောင်းထားတယ်။
မကွေးဆရာတော်
တောင်သူတွေဘက်က ဘာတောင်းဆိုတာလဲ။ ဒီဘက်က ဘာကိုမပေးနိုင်တာလဲ။
ဦးညီညီဝင်း ( မြို့နယ်အုပ်ချုပ်ရေးမှုး )
တောင်သူတွေဘက်ကတော့ လယ်မြေပြန်ရရှိဖို့တောင်းဆိုတာပါ။ ဒီဘက်ကလည်း တရားဝင် လ.န. ၃၉ လည်း ကျပြီးသားဆိုတော့ ၊ တပည့်တော်တို့က ဖျောင်းဖျောင်ဖျဖျနဲ့ ဒီဟာလေးကို ဥပဒေလမ်းကြောင်းကနေပြီး ထောက်ပြပေါ့။ မကြာခင် ရည်မှန်းချက်ပန်းတိုင်ကို ရမှာပေါ့။ သူတို့တွေက စိတ်ခံစားမှုတွေများပြီးတော့ ဒီနေရာကဖယ်ရရင်ကို သူတို့အနေနဲ့ ဆုံးရှုံးတယ်လို့ ထင်နေပါတယ်။
ရွှေည၀ါဆရာတော်
တောင်သူလယ်သမားတွေ ယုံကြည်အောင် ဒကာကြီးတို့နဲ့ ကျုပ်တို့ ဆရာတော်တွေနဲ့ လက်တွဲပြီးတော့ နောက်ထပ် ပဋိပက္ခတွေ ၊ မီးပွားတွေ မလောင်ကျွမ်းရေးကို ကျုပ်တို့က သူတို့ကို ဆုံးမသြ၀ါဒပေးပြီးတော့ ၊ ဒကာကြီးတို့ သက်ဆိုင်ရာတာဝန်ရှိ ပုဂ္ဂိုလ်များကလည်း မျှတအောင်ဆောင်ရွက်ပေးမယ် ၊ ကျုပ်တို့ကလည်း တောင်သူလယ်သမားတွေ လူကြီးလူကောင်းဆန်းဆန် ပြောနေတာကိုယုံပါ။ ကျုပ်တို့လည်း ကြားမှာရှိပါတယ်ဆိုတာ ပြောပေးမယ်။ နောက်ထပ်မဖြစ်ကြနဲ့။ အားလုံး မျှော်လင့်ထားတဲ့အရာတွေ ပျောက်ဆုံးသွားမယ်။
ဆရာတော်ဦးဝီရသူ
တောင်သူလယ်သမားတွေလိုချင်တဲ့အတိုင်း စာတင်ပြီးတောင်းတာရှိလား။
ဦးညီညီဝင်း ( မြို့နယ်အုပ်ချုပ်ရေးမှုး )
စာတော့ မတင်ရသေးဘူး။ တပည့်တော်တို့ဘက်က ကူညီပေးမယ် ၊ နားလည်တယ်။ ဒေသဆိုင်ရာ ဖွံ့ဖြိုးရေးလုပ်နေတဲ့ အဖွဲ့အစည်းအသီးသီးကိုလည်း အကုန်လုံးပြမယ်။
ဆရာတော်ဦးဝီရသူ
သူပိုင်သင့်တယ် ၊ ကိုယ်ပိုင်သင့်တယ်ဆိုရင် ကိုယ့်ဘက်က အထောက်အထားပြရမယ်။ ဒီအထောက်အထားတွေပြပြီးတော့ ဆိုင်ရာအစိုးရအဆင့်ဆင့်ကို အကူအညီတောင်းတာရှိလား။
ဦးညီညီဝင်း ( မြို့နယ်အုပ်ချုပ်ရေးမှုး )
မရှိသေးပါဘူး။ ၉၆ ခုနှစ်က ရေနက်ကွင်းတွေ ဖော်ထုတ်ခဲ့တယ်။ ဖော်ထုတ်ခဲ့တုန်းကတော့ မြေလွတ်မြေရိုင်းအနေနဲ့ ဖော်ထုတ်ခဲ့တယ်။ ၂၀၀၄ ခုနှစ်မှာ သူတို့က ဒီဟာကို ကန်စပတ်တယ်ပေါ့။ ဒီဟာကို ငါးမွေးကန်အဖြစ်ရခဲ့တယ်။ လန ၃၉ ကျပြီးသားပါ။ ငါးမွေးကန်အဖြစ်ရခဲ့တယ်ပေါ့။ ၂၀၀၄ ခုနှစ်မှာ ဒီပြဿနာတွေဖြစ်တဲ့အတွက် တပည့်တော်တို့ မှတ်တမ်းများအရတော့ ခရကဥက္ကဌ ဗိုလ်မှုးကြီးစိန်မောင် လက်ထက်က ဒီမှာလာရောက်ပြီး တောင်သူလယ်သမား ၇၆ ဦးကို ဘယ်ဘက်အခြမ်း ဧက ၄၅၀ ကိုလုပ်ပါ။ ဒီဘက်အခြမ်း ဧက ၅၅၀ ကို ကုမ္ပဏီဘက်ကလုပ်ပါ ဆိုပြီးတော့ ပေးခဲ့တယ်။ ၇၆ ဦးကို နှစ်သောင်းနှုန်းနဲ့ ကုမ္ပဏီက ပေးလျော်ခဲ့တယ်။ ဒါပေမယ့် ရယကဥက္ကဌကပဲ ယူထားသလိုပေါ့လေ။ အဲဒီလို အကြောင်းတရားလေးတွေ ရှိခဲ့လို့ အခုလို အကျိုးတရားလေးတွေ ဖြစ်ပျက်နေတာပါ။ ပစ္စည်းသက်သေ အနေနဲ့ကျတော့ စပါးတာဝန်ကျေ ခေတ်ကာလဆိုတော့ ပြေစာမဖောက်တော့ဘူး။ ဘယ်လိုပဲဖြစ်နေနေ တပည့်တော်တို့က ဆောင်ရွက်ပေးပါမယ်။ အုပ်ချုပ်ရေးပိုင်းကလည်း ဆောင်ရွက်ပေးပါမယ်။ လွှတ်တော်ကိုယ်စားလှယ်ပိုင်းကလည်း ဆောင်ရွက်ပေးပါမယ်။
ရွှေည၀ါဆရာတော်
ဘုန်းကြီးတို့ သုံးပါးကြွလာရခြင်းဟာ ရေရှည်မှာ ပဋိပက္ခတွေကို မေတ္တာရပ်ခံပြီးတော့ ဒကာကြီးတို့ တာဝန်ရှိ ပုဂ္ဂိုလ်များနဲ့ရော ၊ ဒီဘက်က တောင်သူလယ်သမားများနဲ့ရော ၊ နောက်ထပ်ပဋိပက္ခတွေ မဖြစ်ပေါ်စေရေးအတွက် တရားလေးဘာလေး ဆုံးမမှုလေးတွေ နှစ်ဦးနှစ်ဘက်ကိုပေးရင်း ၊ ထိခိုက်ဒါဏ်ရာရသူများအတွက်လည်း လှုချင် တန်းချင် ပေးချင်လို့လာခဲ့တာပါ။ လုံခြုံရေးတပ်ဖွဲ့ဝင်တွေရောတောင်သူလယ်သမားတွေရော အားလုံးအပေါ်မှာ တတ်နိုင်သလောက် အေးချမ်းသာယာတဲ့တိုင်းပြည်ဖြစ်အောင် ဒကာကြီးတို့လည်း ဘုန်းကြီးတို့နဲ့အတူ ရွာသူရွာသားတွေရဲ့ကောင်းကျိုးကို ပူးပေါင်းဆောင်ရွက်ပေးပါ။
ဦးအေးသောင်း ( ခရိုင်အုပ်ချုပ်ရေးမှုး )
ပိုင်တယ် မပိုင်ဘူး ၊ သိမ်းတယ် မသိမ်းဘူး ၊ တရားတယ် မတရားဘူးဆိုတာတော့ အရင်ခေတ်က ကိစ္စတွေပေါ့။ ဒါတွေဟာလည်း အကြောင်းရှိလို့ အကျိုးဖြစ်လာတယ်။ သို့သော် ဒါကိုဖြေရှင်းတဲ့အခါ ဥပဒေနဲ့အညီ ဖြေရှင်းဖို့ လိုပါတယ်။ လယ်ယာမြေဥပဒေရှိတယ်။ လယ်ယာစုံစမ်းရေးကော်မရှင်ရှိတယ်။ ကျေးရွာတွေက နစ်နာတဲ့ လယ်သမားတွေစုပြီးတော့မှ သူတို့နစ်နာချက် ၊ ခံစားဖြစ်ပျက်တဲ့ အရာအားလုံးကို ပစ္စည်းသက်သေ ၊ လူသက်သေပြုစုပြီးမှ လူမှုအသင်းအဖွဲ့တွေ လွှတ်တော်ကိုယ်စားလှယ်တွေနဲ့ ၀ိုင်းဝန်းတိုင်ပင်ပြီးတော့ ရေးပေးလိုက်ပါ။ ဒီစာကို ကျွန်တော့်လက်ထဲထည့်ပါ။ ကျွန်တော် တိုင်းဒေသကြီးအစိုးရလက်ထဲ သွားပြီးတင်ပြပါ့မယ်။ မျှတတဲ့စုံစမ်းစစ်ဆေးရေး လုပ်ပေးပါမယ်။ မနစ်နာစေဖို့ အကောင်းဆုံးအဖြေရအောင် လုပ်ပေးပါမယ်။ မီးတွေရှို့တာတွေ ရှိပါတယ်။ လွှတ်တော်ကိုယ်စားလှယ် ဦးစိန်ဝင်းတို့နဲ့ ညှိနှိုင်းပါတယ်။ ဒီကိစ္စမှာ ဥပဒေအရ ခံယူပါ။ စုံစမ်းစစ်ဆေးတဲ့ကာလတလျှောက်မှာ တောင်သူလယ်သမားတွေလည်း တာပေါင်ပေါ်မတက်နဲ့။
ကုမ္ပဏီကလည်း ဒီအတွင်းမှာ ရေတွေဘာတွေ ထပ်မသွင်းနဲ့ ငါးတွေဘာတွေမရှာနဲ့လို့ ပြောပါတယ်။ ပြောတဲ့အခါလည်း ရွာသားတွေအားလုံးလက်ခံပါတယ်။ လက်ခံလို့ရွာသားတွေ အောက်တောင်ဆင်းသွားပြီးပါပြီ။ အဲဒီမှာ တစ်ယောက်က လက်မခံဘူးဆိုပြီးဖြေလိုက်တဲ့အခါ ညနေစောင်းဖြစ်သွားတာပါ။ ဖြစ်တာကတော့ ဖြစ်သွားပြီ။
ရွှေည၀ါဆရာတော်
ပြေလည်ခါနီးအချိန်မှာ အဲဒီလို ပေါက်ကွဲမှု ၊ ရုန်းရင်းဆန်ခတ်လေးဖြစ်သွားအောင် ဘယ်လို ၊ ဘယ်လို အကြံမျိုးနဲ့ ဖျက်လိုက်လဲဆိုတာကြားသိရတယ်။
ဦးအေးသောင်း ( ခရိုင်အုပ်ချုပ်ရေးမှုး )
တရားတာ မတရားတာတွေ ကိစ္စကတော့ ဥပဒေဘောင်အတွင်းကပဲ ငြိမ်းချမ်းစွာဖြေရှင်းရမှာပါ။ ကျေးရွာအုပ်ချုပ်ရေးမှုးကြီး ခေါင်းဆောင်ပြီးတော့ အားလုံးစု ၊ မိမိတို့နစ်နာချက်နဲ့ပတ်သက်ပြီးတော့ အမှန်အတိုင်းရေးပါ။ မြို့နယ်မှုးကိုပို့ပါ။ မြို့နယ်မှုးကတဆင့် တိုင်းဒေသကြီးအစိုးရအဖွဲ့ကို ချက်ချင်းပို့ပါ။ အကောင်းဆုံးစုံစမ်းပြီးတော့ အဖြေသိရအောင် ဆောင်ရွက်ပေးပါမယ်။ အဓိက ကတော့ တောင်သူလယ်သမားကိုပဲ စောင့်ရှောက်ရမှာဖြစ်ပါတယ်။ သို့သော်လည်း ဥပဒေအတိုင်းပဲ လုပ်ရပါတယ်။ ဒါကို ဥပဒေအတိုင်းမလုပ်ဘဲ ဆန့်ကျင်မှုကို ခွင့်ပြုထားမယ်ဆိုရင် ပြန့်ပွားပြီး မင်းမဲ့စရိုက်တွေဖြစ်သွားမှာပါ။
ဆရာတော်ဦးဝီရသူ
အဲဒီတော့ ဒကာကြီး … ဦးဇင်းပြောမယ်။ နံပါတ် ၁ ကတော့ ဒကာကြီးတို့က အေးအေးချမ်းချမ်း ဖြစ်စေချင်တယ်။ ရွာသူရွာသားတွေကလည်း အကြမ်းမဖက်ချင်ကြပါဘူး။ ဘယ်သူမှ ၀ရုန်းသုန်းကား မဖြစ်စေချင်ဘူး။ အားလုံးက အေးအေးချမ်းချမ်း ဖြစ်စေချင်တယ်။ အေးအေးချမ်းချမ်းဖြစ်ဖို့ မျှမျှတတရှိဖို့လိုတယ်။ မျှမျှတတရှိဖို့အတွက် ဒကာကြီးတို့က ဦးပဉ္ဇင်းတို့ကို လျှောက်တာ နည်းမှန်လမ်းမှန်ရှိတယ်။ နည်းမှန်လမ်းမှန်ကျတဲ့အပေါ်မှာ ရွာသူရွာသားတွေက ယုံကြည်မှုအားနည်းတယ်။ ယုံကြည်မှု ပိုပြီးတည်ဆောက်နိုင်အောင် ထင်သာမြင်သာ လုပ်ပေးဖို့ပဲ။ ထင်သာမြင်သာဆိုတာက ရွာသူရွာသားတွေက တင်လိုက်လို့ မြို့နယ်ရောက်ပြီ ၊ ခရိုင်ရောက်ပြီ ၊ တိုင်းအဆင့်ကိုရောက်ပြီ ၊ အရေးယူဆောင်ရွက်တာတော့ ဘယ်အဆင့်ရှိပြီဆိုတာ ချပြဖို့တော့ ကူညီပါ။
ဦးအေးသောင်း ( ခရိုင်အုပ်ချုပ်ရေးမှုး )
တပည့်တော်လျှောက်ထားတာ အဲဒီအဆင့်တောင်မဟုတ်ဘူး။ အဲဒီလိုရေးသားတင်ပြချက်ကို တပည့်တော်လက်ထဲထည့် တပည့်တော်တိုင်းဒေသကြီးကို ချက်ခြင်းသွားပေးမယ်။ ချက်ခြင်းလုပ်ဖို့ အစိုးရအဖွဲ့ကလည်း ကတိပေးထားတယ်။ ဒါကို တုတ်နဲ့ဓါးနဲ့အင်နဲ့အားနဲ့ ဖြစ်တာလေ။ ဒါကြီးကို အကြာကြီးထားရင် မကောင်းတဲ့ကိစ္စ။
ဆရာတော်ဦးဝီရသူ
ဟုတ်တယ်။ ဒကာကြီးတို့ ပြောတာမှန်တယ်။ ဒါက နှုတ်ကတိဖြစ်နေတယ်။ ခေတ်အဆက်ဆက် ခံခဲ့ရတာဆိုတော့ နှုတ်ကတိအပေါ် ယုံကြည်မှုအားနည်းနေတော့ ထင်သာမြင်သာရှိအောင် ချပြပါလို့ ဦးပဉ္ဇင်းတို့က တောင်းဆိုနေတာ။ ဦးပဉ္ဇင်းတို့က ဥပဒေဘောင်အတွင်းက အလုပ်လုပ်နိုင်အောင် လမ်းညွှန်မယ်။ ဆိုင်ရာအဖွဲ့အစည်းတွေကူညီအောင်လည်း ပြောမယ်။ ဒါက အနာဂါတ်ကိုပြောတာပါ။ လောလောဆယ် ပဋိပက္ခဖြစ်သွားပြီးတဲ့အပိုင်းမှာတော့ ရွာသူရွာသားတွေလည်း အေးအေးချမ်းချမ်း ကိုယ့်အိုးကိုယ့်အိမ်နဲ့ နေနိုင်အောင် အချိန်ကာလတစ်ခုသတ်မှတ်ပေးမှဖြစ်မယ်။ ဒကာကြီးတို့ဘက်ကလည်း ဒီပြဿနာကို အကြောင်းပြုပြီး ဖမ်းဆီးတာမလုပ်ဖို့လည်း ဒကာကြီးတို့ စောင့်စည်းဖို့တော့လိုမယ်။ အခုလာတာ ထောက်ပံ့ရေးလည်းပါတယ်။ ပြည်သူတွေတင်ပေးမှာ မဟုတ်ဘူး။ ရဲတပ်ဖွဲ့ဝင်တွေကိုလည်း ပေးမှာပါ။ ရဲလည်းပြည်သူပါ ပြည်သူတွေထဲက ပေါက်ဖွားတာပါပဲ။ ရဲလည်း ပြည်သူတွေကို မရိုက်ချင်ပါဘူး။ တာဝန်အရ အလုပ်လုပ်ရင်း အမှားတစ်ခု ကျူးလွန်တယ်ပဲ ဆိုပါတော့။
ရဲမှုးတင့်ဆွေ ( မြို့နယ်ရဲတပ်ဖွဲ့မှုး )
တပည့်တော်လျှောက်ထားပါရစေ။ စဖြစ်ကတည်းက မဖြစ်စေချင်လို့ အတန်တန်ညှိနှိုင်းပါတယ်။ သုံးရက်လောက် ညှိနှိုင်းပါတယ်။ ညှိနှိုင်းတဲ့အထိ စောင့်ပါတယ်။ တကယ်ဖြစ်ပွားတဲ့နေ့မှာလည်း တပည့်တော် လက်နက်မကိုင် ပါဘူး။ မလုပ်ပါနဲ့။ နောက်ဆုတ်ပါ။ တောင်းပန်ပြီးသွားတဲ့အချိန်မှာပဲ တပည့်တော်တို့ကို ရိုက်ပြီး ဓါးနဲ့ခုတ်ပါတယ်။ တပည့်တော်မှာ ဓါးဒဏ်ရာတုတ်ဒဏ်ရာတွေရှိပါတယ်။ တပည့်တော် ဗွေမယူပါဘူး။ တပည့်တော်တို့က နှစ်ဦးနှစ်ဘက် ကြားထဲမှာ ပြဿနာမဖြစ်အောင် ထိန်းပေးတာပါ။ ငါးကန်လုပ်သားနဲ့ လာတဲ့ပြည်သူလူထု ထိပ်တိုက်မဖြစ်အောင် တပည့်တော်တို့ ရင်ဆိုင်ပြီး ကြားထဲကရှင်းပေးနေတဲ့ကိစ္စကို မလိုက်နာဘဲ ဖြစ်လာတော့ တပည့်တော်တို့မှာလည်း တာဝန်ဝတ္တရားဆိုတာ ရှိပါတယ်။ တပည့်တော်တို့ရဲ့ အထက်အဖွဲ့အစည်းက တာဝန်ပေးလိုက်ပြီဆိုရင် ငြင်းလို့မရပါဘူး။ ငြင်းလို့မရတဲ့အတွက် ဆောင်ရွက်တဲ့အခါမှာ ပြည်သူလူထုကလည်း လိုက်နာသင့်သလောက် လိုက်နာဖို့လိုပါတယ်။ မလိုက်နာတဲ့အတွက် ခုလိုပြဿနာတွေ ဖြစ်သွားတယ်လို့ ထင်ပါတယ်ဘုရား။
