လာမည့်ရွေးကောက်ပွဲအပြီး ဘယ်လိုအစိုးရတက်လာပြီး ဘယ်လိုမူဝါဒလမ်းစဉ်တွေနဲ့ မြန်မာပြည်ကြီးဆက်လက်တိုးတက်အောင် လုပ်ပါ့မလဲလို့ နေ့စဉ်တွေးနေသူတွေထဲမှာ ကျနော်လည်းပါ ပါတယ်။ ကိုယ့်အလုပ်ကိုလုပ်နေတာဆိုပေမယ့် တနိုင်ငံလုံးနဲ့ဆိုင်တဲ့ တသက်မှာပထမဆုံးအကြိမ် လွတ်လပ်ပြီးတရားမျှတတဲ့ရွေးကောက်ပွဲကို ကြိုတင်ရင်ခုန်နေရတာ သမီးရည်းစားချိန်းတွေ့တုန်းကလို ရင်ထဲက ဒိန်းတပ်တပ်ဒိန်းပေါ့ဗျာ။
အရပ်သားစကားပြောရရင် အပေါင်းအသင်းတွေက ကျနော့်လိုအငြိမ်းစားစစ်သားတစ်ယောက်ကို တွေ့တာနဲ့ လာမည့်ရွေးကောက်ပွဲမှာ ဘယ်ပါတီနိုင်မယ်ထင်သလဲ၊ ဘယ်သူသမ္မတဖြစ်နိုင်လဲ၊ တပ်မတော်က ဘာတွေပြောင်းလဲနိုင်သလဲ၊ ဒီမေးခွန်း(၃)ခုကို အမြဲ မေးပါတယ်။
ကျနော့်အဖြေက (၃)ခုစလုံး ကျနော်ဘာမှ မသိပါဘူး။ (ဟုတ်တယ်လေ ××× မနက်ဖြန်တောင် ဘာဖြစ်မယ်မှန်း မသိနိုင်တာ၊ အခုရွေးကောက်ပွဲဝင်မယ့် ကိုယ်စားလှယ်လောင်းတွေတောင် MASTER PLAN အရ မိမိသာအစိုးရဖြစ်ရင် တစ်နှစ်အတွင်းဘာလုပ်မယ်၊ နှစ်နှစ်ကြာရင်ဘယ်လိုဖြစ်မယ်၊ သုံးနှစ်ဆိုဘယ်လောက်တိုးတက်မယ်၊ လေးနှစ်အကြာနောက်အစိုးရကို အခက်အခဲမဖြစ်အောင် ဘယ်လိုလက်ဆင့်ကမ်းခဲ့မယ် ဆိုတာမျိုး မကြားမိသေးဘူး။)
အားလုံးက ပြုပြင်ပြောင်းလဲမယ်ဆိုတာချည်းပဲ ကြွေးကြော်နေကြတာ။ ဘယ်ဟာကို ဘယ်ကစပြုပြင်ပြောင်းလဲမယ်လို့ မကြားမိဘူး။ ကိုယ်စားလှယ်အမတ်လောင်း တစ်ယောက်ကိုမေးကြည့်ဖူးတယ်၊ အဘ ×× ရွေးချယ်ခံရရင် ဘာလုပ်မယ်လို့ ဆုံးဖြတ်ထားသလဲပေါ့။ ဆရာ့သဘော(သမ္မတကို ဆိုလိုပါသည်) တဲ့ဗျာ၊ ဆရာတာဝန်ပေးတာ လုပ်မှာပေါ့တဲ့။
ကျနော်စိတ်ထဲကျိတ်ပြီး CREDIT ပေးမိပါတယ်။ ကျနော်တို့ဟာ အခုထိအထက်ကခိုင်းတာပဲလုပ်မယ်၊ အပိုလုပ်ရင်၊ လျှာရှည်ရင် အရေးယူခံရလိမ့်မယ်ဆိုတဲ့ အစွဲတွေရှိနေသေးတော့ တီထွင်ဖန်တီးမှုဥာဏ်နဲ့စွမ်းပကားတွေ ပျောက်ဆုံးနေခဲ့ကြတာ သင်ခန်းစာမဖေါ်ထုတ်နိုင်ကြသေးဘူးပဲ။ မေးခွန်းမှာ ကျနော်ကြားချင်တဲ့အဖြေက မိမိရွေးချယ်ခံမည့်မြို့က စီးပွားရေးမှာနိမ့်ကျနေရင် ဘယ်လိုဆောင်ရွက်ပေးမယ်၊ ပညာရေးမှာနောက်ကျနေရင် ဘယ်လိုပံ့ပိုးပေးမယ်၊ ဘုရား၊ကျောင်း၊ကန်၊လမ်းတံတားတွေကို ဘယ်လိုအဆင့်မီစေရမယ်လို့ ပြောစေချင်တာပါ။ ပြည်သူတွေဘ၀သာယာလှပရမည်၊ လုံခြုံအေးချမ်းရမည်ဆိုတဲ့ ယေဘုံယျဆန်ဆန်စကားတွေက လက်တွေ့မဆန်ပါဘူး။ လူတိုင်းပြောတတ်ပါတယ်။
ကျနော့်အဖြေကို သဘောမတွေ့တဲ့မိတ်ဆွေတွေက တစ်ခုခုတော့ပြောဗျာလို့ ထပ်ကွန့်တယ်။ အဲဒီတော့ ကျနော့်စိတ်ထဲရှိတာတွေ ပြောလိုက်တယ်ဗျာ။ (စိတ်ထဲရှိတာပြောတာမို့ အမှန်တွေပါ၊ အမှားတွေပါလို့ မယူဆကြပါနဲ့၊ ကိုယ့်ဘာသာကိုယ် စဉ်းစားကြည့်ပါ။ ပညာရှင်၊ ဆောင်းပါးရှင်တွေလည်း ရှုထောင့်အမျိုးမျိုးကနေ ရေးနေတာတွေကို ပြည်သူတွေမှတ်သားမိကြမှာပါ။)
၁။ တစ်အချက်- အစိုးရအသစ်မည်သူဖြစ်လာသည်ဖြစ်စေ တပ်မတော်ကိုပစ်ပယ်ထားလို့ မရသေးပါဘူး။ အစိုးရဖွဲ့နိုင်မည်ဟု မျှော်လင့်ထားသည့်ပါတီတိုင်းသည် တပ်မတော်ကို စိတ်ရောကိုယ်ပါပေါင်းရပါမယ်။ အခုကတည်းက တပ်မတော်အကြောင်းသိပြီး တပ်မတော်နဲ့ GIVE & TAKE လုပ်ထားနိုင်မှသာ အစိုးရလုပ်ငန်းတိုင်းမှာ တပ်မတော်ရဲ့ထောက်ခံမှု(၀ါ) စွက်ဖက်မှုကင်းနိုင်မှာပါ။ တပ်ရဲ့ထောက်ခံမှုမရလည်း လုပ်နိုင်ပါတယ်လို့ မယူဆစေချင်ပါဘူး။ ခြေဥနဲ့ပြီးခဲ့တဲ့လွှတ်တော်တွင်း အခြေအနေတွေကို သင်ခန်းစာယူစေချင်ပါတယ်။ အစိုးရဖွဲ့ပြီးတာနဲ့ ခြေဥပြင်ပြီး တပ်ကိုစစ်တန်းလျားပြန်ပို့နိုင်လိမ့်မယ်လို့လည်း မယူဆစေချင်ပါဘူး။ ဒီအဆင့်တွေဟာ တစ်ခုပြီးတစ်ခု စိတ်ရှည်သည်းခံပြီး လုပ်သွားရမယ့်အပိုင်းတွေ အများကြီးပါပါတယ်။
၂။ နှစ်အချက်- တပ်မတော်လို့ဆိုလိုက်တာနဲ့ တပ်မတော်ရဲ့အခေါင်အထွဋ်ဖြစ်တဲ့ ကာကွယ်ရေးဦးစီးချုပ်ကိုသာ ပြေးမြင်လိုက်ပါ။ လူသားတစ်ယောက်အုပ်ချုပ်နေတာဖြစ်လို့ လူသားတစ်ဦးပီသစွာ ဂုဏ်သိက္ခာနဲ့အညီ အုပ်ချုပ်နေမှာပါ။ တပ်မတော်ဆိုတာကိုက အထက်အမိန့်အတိုင်း လိုက်နာလုပ်ဆောင်ရတာဖြစ်လို့ ကာချုပ်တစ်ယောက်ရဲ့အရည်အချင်းကိုသိချင်ရင် တပ်ရဲ့အရည်အသွေးကိုကြည့်တာနဲ့ သိနိုင်ပါလိမ့်မယ်။ ယနေ့တပ်မတော်မှာ လက်နက်စွမ်းရည်တွေ တိုးတက်နေပေမယ့် ဒေသတွင်းနိုင်ငံတွေကို မကျော်ဖြတ်နိုင်သေးပါဘူး။ ဒါ့အပြင် အင်အားအရလည်း လိုအပ်နေဆဲပါ။ ဒီတော့ တပ်မတော်ရဲ့လိုအပ်ချက်တွေ ဖြည့်ဆည်းပေးနိုင်မည့် အစိုးရကိုသာ တပ်ကလည်းထောက်ခံမှာ ဖြစ်ပါတယ်။
၃။ သုံးအချက်- ပြည်သူနဲ့တပ်မတော်တစ်စိတ်တစ်ဝမ်းထဲ ဖြစ်ဖို့ရာ နောင်လာမည့် အစိုးရ၏တပ်မတော်အပေါ် ဆက်ဆံရေးမှာ များစွာမူတည်နေပါတယ်။ ဆိုလိုတာက အစိုးရအသစ်သည် တပ်မတော်ကို သိမ်မွေ့စွာကိုင်တွယ် ထိန်းကျောင်းတတ်ဖို့ လိုပါတယ်။ ကြမ်းကြမ်းတမ်းတမ်းကိုင်တွယ်မှုတွေရှိလာခဲ့ရင် မလိုလားအပ်တဲ့ ဘေးထွက်ဆိုးကျိုးတွေကို ပြည်သူတွေပဲ ခံစားကြရမှာပါ။ တပ်မတော်သည် အစိုးရအသစ်အပေါ် တော်တည့်မှန်ကန်စွာသစ္စာစောင့်မည်ဟုဆိုသော်လည်း တပ်မတော်ရဲ့မူလတာဝန်လို့ ခံယူထားတဲ့ ပြည်ထောင်စုမပြိုကွဲရေး၊ ဖွဲ့စည်းပုံအခြေခံဥပဒေကို ကာကွယ်စောင့်ရှောက်ရေးဆိုတဲ့ အချက်တွေမှာ အန္တရာယ်ရှိတယ်လို့ ကာချုပ်အနေဖြင့်ယူဆလျှင် နိုင်ငံရေးမှာအဖုအထစ်တွေ ပေါ်ပေါက်လာနိုင်စရာရှိပါတယ်။
နံပါတ်(၃)အချက်သည် အရေးကြီးဆုံးဖြစ်ပါတယ်။ တပ်မတော်နဲ့ပြည်သူညီညွတ်စွာ ဆောင်ရွက်မှသာ နိုင်ငံ့အရေးကိစ္စတွေ အောင်အောင်မြင်မြင် ပြီးဆုံးနိုင်မှာပါ။ ပြည်သူဆိုတာလည်း တစ်နည်းအားဖြင့် ပြည်သူတွေက ရွေးချယ်ပေးလိုက်တဲ့ အစိုးရပဲဖြစ်ပါတယ်။ ပြည်သူကရွေးချယ်ပေးလိုက်တဲ့အစိုးရနဲ့ တပ်မတော်သည် အရာရာမှာ အတိုက်အခံဖြစ်နေရင် ဒီမိုကရေစီဖြစ်ထွန်းရေးလမ်းစဉ်တွေ နှောင့်နှေးနေအုံးမှာပါ။ တပ်မတော်သည်လည်း ပြည်သူတွေရဲ့နှလုံးသားနဲ့ ဝေးသထက်ဝေးသွားမှာပါ။ ဒါကိုတော့ အစိုးရအသစ်ရော တပ်မတော်ရော အထူးသတိချပ်ရမှာ ဖြစ်ပါတယ်။
၎။ လေးအချက်- ဒါဖြင့် တပ်မတော်ကို အစိုးရအသစ်က လိုက်ပြီးညှိနှိုင်းနေရမှာလားလို့ ဆိုလိုတာမဟုတ်ပါဘူး။ အထက်ကပြောခဲ့သလို အပေးအယူ မဖြစ်မနေလုပ်ရမှာပါ။ တပ်ကိုနိုင်ငံရေးဖြစ်စဉ်တွေ၊ လွှတ်တော်ထဲက တဖြည်းဖြည်းဖယ်ထုတ်ဖို့ဆိုတာ အစိုးရအသစ်ရဲ့ အပေးအယူလုပ်ငန်းစဉ်တွေ ဘယ်လောက်အောင်မြင်မလဲဆိုတာပေါ် မူတည်ပါတယ်။ အပေးအယူလုပ်ဖို့လိုအပ်တာကလည်း လက်ရှိခြေဥကြောင့်ပဲဖြစ်ပါတယ်။ လွှတ်တော်တွင်း မဲခွဲမှုမှာ ခြေဥပြင်ဆင်ရေးအတွက် ထောက်ခံမှုများသည့်တိုင် တပ်ကိုယ်စားလှယ်တွေက တညီတညွတ်တည်း ငြင်းပယ်လိုက်ရင် ကျိုးစားခဲ့သမျှအားလုံး သဲထဲရေသွန်ဖြစ်ဖို့ပဲ ရှိပါတယ်။
၅။ ငါးအချက်- ပြည်သူလို့ဆိုလိုက်တာနဲ့ အရပ်သားအစိုးရ၀န်ထမ်းတွေလည်း ပါဝင်ပါတယ်။ ၀န်ထမ်းဟူသည်ပါတီနိုင်ငံရေး ကင်းရှင်းရမည်ဟုဆိုထားသော်လည်း ဖွဘုတ်ပေါ်မှာ ပြစ်ပြစ်နှစ်နှစ်ရေးသားတိုက်ခိုက်နေကြသူတွေထဲ ပါတီစွဲထားတဲ့ အစိုးရ၀န်ထမ်းတွေ အများကြီးပါနေတယ်။ အချို့ဆို ကွန်မန်ဒါအဆင့်၊ ညွှန်ချုပ်၊ ညွှန်မှူးအဆင့်တွေအထိ ရာထူးကြီးတွေ ထမ်းဆောင်နေသူတွေပါ။ အကယ်၍သင်တို့ မထောက်ခံတဲ့ပါတီ၊ လူပုဂ္ဂိုလ်က အစိုးရဖြစ်မယ်၊ သမ္မတဖြစ်လာခဲ့မယ်ဆိုရင် ငါမထောက်ခံလို့၊ ငါမကြိုက်လို့ ငါ့ရာထူး၊ ငါ့တာဝန်ကိုစွန့်ပြီး ဆန္ဒပြမယ်လို့ ဆုံးဖြတ်ထားကြပါသလားခင်ဗျာ။ ဒါမှမဟုတ် အားလုံးကို ထော်လော်ကန့်လန့်လုပ်မယ်လို့ ရည်ရွယ်ထားတာလား ခင်ဗျာ။
အမှန်က ကျနော်တို့အားလုံး PROFESSIONAL (ပရို)ပီသကြဖို့လိုပါတယ်။ မိမိကိုပေးအပ်ထားသောတာဝန်သည် ပြည်သူလူထုက ပေးအပ်ထားတာဖြစ်လို့ မိမိတာဝန်ကိုအကောင်းဆုံးလုပ်မယ်ဆိုတဲ့ စိတ်ဓါတ်လေးမွေးဖို့ လိုနေပါသေးတယ်။ တာဝန်သည် အဘ(အထက်)ကပေးတာလို့ မှတ်ယူထားရင် အဘကိုသာ ကိုးကွယ်နေကြအုံးမှာပါ။ အဘကိုသာ မနေတာဆိုတော့ ပြည်သူအတွက် မလုပ်ပေးနိုင်ပဲရှိမှာပေ့ါ။ ၀န်ထမ်းတွေရဲ့ကိုယ်ရေးရာဇ၀င် ဖြည့်ရတာကိုက ပါတီနိုင်ငံရေးကင်းရှင်းမှုမရှိရင် ရာထူးတက်ဖို့မမြင်ဘူးဆိုတဲ့သူတွေက ဘာဖြစ်လို့ ပါတီစွဲ၊ ပုဂ္ဂိုလ်စွဲတွေ ထားနေကြတာလဲ။ အမှန်တော့ ဒီခေတ်ကြီးထဲမှာ ၀န်ထမ်းတိုင်းပါတီနိုင်ငံရေးနဲ့ ကင်းဖို့ဆိုတာ မဖြစ်နိုင်ပါဘူး။ သို့သော် မည်သည့်ပါတီကိုအားပေးသည်ဖြစ်စေ ၀န်ထမ်းတစ်ယောက်၏တာဝန်၊ ဂုဏ်သိက္ခာ ပျက်ယွင်းဖို့ မသင့်တော်ပါဘူး။ အစိုးရကလည်း ၀န်ထမ်းတွေပါတီနိုင်ငံရေး မလုပ်ရလို့ တားမြစ်ဖို့ မသင့်တော့ပါဘူး။
ဒါတွေအားလုံးကိုသိတယ်၊ လုပ်လည်းလုပ်နိုင်တယ်၊ အချိန်မတန်သေးလို့ မပြောသေးတာဆိုရင်လည်း အခုအခါအချိန်တန်နေပြီဖြစ်ကြောင်း ပြောကြားလိုပါတယ်။ မိမိကိုယ်ကို အစိုးရဖွဲ့ဖို့ရည်ရွယ်ချက်ရှိတဲ့ပါတီတွေအနေဖြင့် တပ်မတော်အပေါ်ချဉ်းကပ်မည့် မိမိတို့ပါတီရဲ့မူဝါဒကို ရှင်းရှင်းလင်းလင်းအသိပေးသင့်ပြီဖြစ်ကြောင်း ရေးသားတင်ဆက်လိုက်ရပါတယ်။
Zarni Yan
(၅.၁၁.၁၅)