…………………
(၁)
"အဖေ သမီးလုပ်ထားတဲ့ အိုးလေးလှလား။ ဘယ်လောက်ရလည်းဟင် "
"မှန်း ကြည့်ရအောင်။ အမယ်လှသား။ ဟ ၂၃၀ တောင်ရသဗျ "
ဖုန်းထဲမှာထည့်ထားတဲ့ Pottery ဆိုတဲ့ Game လေးကို သမီးကဆော့နေတာပါ။ ဒီဂိမ်းလေးက ကိုယ်တိုင်ဖန်တီးမှု စိတ်ကူးဥာဏ်ကို ဖွင့်ပေးစေတယ်ထင်လို့ ကျွန်တော်ပေးဆော့ထားတာပါ။ အိုးလေးတွေကို ကိုယ်တိုင်ပုံစံလုပ်ရသည်။ ပြီးလျှင်ရောင်းရသည်။ ရသည့်ပိုက်ဆံလေးတွေနှင့် အရောင်လေးတွေ၊ ကြွေရည် တွေ၊ အကွက်အဆင်ဒီဇိုင်းပုံစံလေးတွေကို ၀ယ်ရသည်။
ကိုယ်ဝယ်ထားသည့် အရောင်လေးတွေနှင့် အဆင်လေးတွေကို ကိုယ်လုပ်ထားသည့် အိုးလေးမှာ အလှဆင်။ ပြီးလျှင် လေလံတင်ရောင်းပေါ့။ အရောင်လေးတွေဖြင့် ကိုယ်စိတ်ကူးဥာဏ်လေးတွေ၊ ဖန်တီး နိုင်စွမ်းလေးတွေဟာ ကလေးရဲ့အတွေးမှာဖြစ်အောင် လုပ်ပေးနိုင်တယ်လို့ထင်ပါသည်။ ဥာဏ်ထက်မြက်စေဖို့ အတွက်အထောက်အကူပြုမည်လို့ ထင်ပါသည်။
ခုသူလုပ်ထားတဲ့အိုးလေးတွေကြည့်ပြီး သူသဘောကျနေသည်။ အရောင်လေးတွေကို စုံနေအောင် စပ်ပြီးချယ်၊ အကွက်လေးတွေ၊ ပန်းလေးတွေဆင်၊ ပန်းအိုးလေးတွေကို ကိုင်းတတ်သင့်တာတတ်ပြီး သူဘာသာ သူရောင်းနေတော့တာ။ စာက မဖတ်တတ်သေးတော့ ပိုက်ဆံဘယ်လောက်ရတယ်ဆိုတာမသိချေ။
အဖေအမေက ဘယ်လောက်တောင်ရတာဆိုလျှင် သူပျော်လို့။ သူလုပ်ထားတဲ့ သူဖန်တီးထားတဲ့ အိုးလေးတွေကြည့်ပြီး သူပျော်နေလိုက်တာလေ။
(၂)
အရောင်နှင့်ပတ်သက်၍ ကျွန်တော့်ဘ၀တွင် အမှတ်တရရှိခဲ့တာလေးကို သတိရမိသည်။ ကျွန်တော် ကောင်မလေးတစ်ယောက်စီက အဖြေကို စောင့်မျှော်နေစဉ်အချိန်ကာလကဖြစ်သည်။ သူနဲ့ ကျွန်တော် ကတော့တစ်နယ်စီပေါ့။ ဒီတော့ ဖုန်းနှင့်ပဲ စကားတွေပြောဖြစ်ကြသည်။
ကျွန်တော်ကတော့ ကိုယ့်ဘက်ပါအောင်ပြောရတာပေါ့လေ။ စည်းရုံးရတာပေါ့လေ။ တစ်နေ့တော့ ကျွန်တော်တို့ ဖုန်းပြောဖြစ်ကြသည်။ သူ့ကို ဘယ်အရောင်တွေကြိုက်တတ်လဲ မေးသည်။ သူက အပြာရောင်၊ အဖြူရောင်လေးတွေ ကြိုက်တဲ့အကြောင်းပြောသည်။ ကျွန်တော်က ကျွန်တော့်စကားလမ်းကြောင်းထဲဝင်လာ အောင်ပြောပြီး ပန်းရောင်ရော မကြိုက်ဘူးလားလို့ ကျွန်တော်က မေးမိသည်။ သူက ခဏမျှစဉ်းစားသွားပြီးမှ သဘောကျကြောင်း၊ ဘာဖြစ်လို့မေးရတာလဲလို့ ပြန်မေးသည်။ ကျွန်တော်ကလည်း ကိုယ့်ဘာသာစဉ်းစား ကြိုက်ရင်သဘောကျရင် ရပြီ။ မပြင်ကြေးလို့ ခပ်တည်တည်ပြောလိုက်သည်။
အဲဒီလိုပြောပြီး အချိန်ကာလကြည့်မြှင့်လာသည့်အခါ သူနှင့်ကျွန်တော် ဘာဘာညာညာမဖြစ်ခဲ့ပါ။ အခင်အမင်ဆုံးသူငယ်ချင်းတွေသာ ဖြစ်ခဲ့ကြပါသည်။ နှစ်အနည်းငယ်ကြာလာပြီးမှ အရောင်တွေနှင့် ပတ်သက်ပြီး စကားစပ်မိရာမှ အတိတ်ကအကြောင်းတွေကို ပွင့်ပွင့်လင်းလင်းပြောဖြစ်ကြသည်။
သူက ကျွန်တော်မေးသည့် ပန်းရောင်ဟာ ဘာအဓိပ္ပာယ်လဲလို့ သူငယ်ချင်းတွေကို ပြောပြပြီး စဉ်းစားကြသည်တဲ့။ ကျွန်တော်ရည်ရွယ်ပြီးပြောလိုက်သည်က "ပန်းရောင် ""ပေါင်းရန် "ဆိုပြီးတော့ပေါ့။ သူတို့သူငယ်ချင်းတွေ ၀ိုင်းပြီးပြောလိုက်တာက "ပန်းရောင်""ပေါင်ယမ်း(ရန်း) "တဲ့လေ။ နင့်ကို ပေါင်ယမ်း (ရန်း)လို့ ကြိုက်တာဖြစ်မယ်လို့ ပြောလိုက်တယ်တဲ့။ ကျွန်တော့်မှာ ရယ်လိုက်ရတဲ့ဖြစ်ခြင်း။
သြော် အသင်လကော..အသင်လောက ဘ၀မှာ ပေါင်းရန်အတွက် ဗျူဟာခင်းလုပ်ခဲ့ပေမယ့် ပေါင်ယမ်း (ရန်း) ပြီးသွားခဲ့ရတာတွေက မနည်းလှပါလား အသင်လောက။
(၃)
ကျွန်တော်တို့ဘ၀စပြီဆိုကတည်းက အရောင်များနှင့် ရင်းနှီးလာခဲ့ကြပါသည်။ ကျွန်တော်တို့ကို နွေးထွေးလုံခြုံစေသည့် အနှီးအဖြူရောင်လေးတွေ၊ ကျွန်တော်တို့လက်ထဲ ပေးထည့်ခဲ့သည့် ဂျောက်ဂျက်လေး တွေသည်လည်း အရောင်မျိုးစုံပင်ဖြစ်သည်။
ကျောင်းတက်စဉ်ကာလမှာလည်း အရောင်မျိုးစုံသင်ရသည်။ အရောင်မျိုးစုံဖြင့်ထိတွေ့ ဆက်ဆံရ ပါသည်။ အနော်ရထာ၊ ကျန်စစ်သား၊ ဘုရင့်နောင်၊ အလောင်းဘုရားဆိုသည့် ကျောင်း၌ အသင်းလိုက်ခွဲ သည့်အခါတွင်လည်း အရောင်တွေဖြင့် သတ်မှတ်ကြပြန်ပါသည်။
ကျွန်တော်တို့ဦးညွတ်အလေးပြုရသည့် ပြည်ထောင်စုသမ္မတမြန်မာနိုင်ငံတော်၏ အလံတွင်လည်း အရောင် ၃ မျိုးပါဝင်နေပေသည်။ အ၀ါ ရောင်၊ အစိမ်းရောင်၊ အနီရောင်နှင့် အဖြူရောင်တို့ဖြစ်သည်။ ထိုအရောင်တိုင်းတွင် အဓိပ္ပာယ်သတ်မှတ်ချက် ကိုယ်စီရှိနေသည်။
အဝါရောင်မှာ ဘာသာ၊ သာသနာနှင့်ပညာတို့ တိုးတက်ခြင်းကိုလည်းကောင်း၊ အစိမ်းရောင်သည် စပါးဆန်ရေ၊ သစ်တောနှင့် ကျွဲနွား အထွေထွေပေါများခြင်းကိုလည်းကောင်း၊ အနီရောင်သည် ရဲစိတ်ရဲမာန် ထက်သန်စေခြင်းကိုလည်းကောင်း အသီးသီးကိုယ်စားပြုကာ အလံ၏အလယ်ဗဟိုရှိ ကြယ်ဖြူကြီးမှာ တစ်စည်း တစ်လုံးတည်းရှိသော ပြည်ထောင်စုကြီးကို ကိုယ်စားပြုပေသည်။ အရောင်အလိုက် ကိုယ်စားပြုမှု နှင့်အတူ အမျိုးဘာသာ၊ သာသနာကိုလည်းကောင်း၊ မိမိနိုင်ငံ၏သယံဇာတများကိုလည်းကောင်း၊ တစ်စည်းတစ်လုံး တည်းရှိသည့် ပြည်ထောင်စုကြီးအားလည်းကောင်း ထာဝရအမြဲတည့်တံနေအောင် ထိန်းသိမ်း စောင့်ရှောက်ရန်မှာ နိုင်ငံသားတိုင်း၏ တာဝန်ပင်ဖြစ်သည်။ သို့မဟုတ်က နိုင်ငံတော်အလံတွင်ပါဝင်သော အ၀ါရောင်၊ အစိမ်းရောင်၊ အနီရောင်နှင့် အဖြူ ရောင်တို့၏ အဓိပ္ပာယ်များသည်လည်းကောင်း၊ ကိုယ်စားပြုသည့် အရောင်နှင့် ကိုယ်စားပြုထားသည့်အရာများသည်လည်းကောင်း ကွယ်ပျောက်သွားပါလိမ့်မည်။
သာသနာ့အလံတွင်လည်း မြတ်စွာဘုရားရှင်၏ ရောင်ချည်တော်များကို ရည်မှန်းလျက် ပြုလုပ် ဖော်ဆောင်ထားသည့် အရောင်များရှိနေပေသည်။ ထိုအရောင်များသည်ကား ကျွန်တော်တို့ စိတ်၏ ကြည်ညို စရာအရောင်များပင်ဖြစ်သည်။
(၄)
ကျွန်တော်တို့ ဘေးပတ်ဝန်းကျင်တွင် အရောင်မျိုးစုံကို မြင်တွေ့နေရပါသည်။ ထိုအရောင်များအပေါ် လူသားအသီးသီးက အဓိပ္ပာယ်သတ်မှတ်ချက်တွေ၊ ခံယူချက်တွေ၊ ခံစားမှုတွေကို ဖြည့်စွက်ကြပါသည်။ အရောင်တစ်ခုတည်းအပေါ် နှစ်သက်သူ၊ မနှစ်သက်သူတွေလည်း အမျိုးမျိုးရှိသည်။ အနီရောင် ဆိုသည်မှာ ရဲရင့်ခြင်း၊ တည်ကြည်ခြင်းဟု နှစ်သက်သူများက သတ်မှတ်သော်လည်း မနှစ်သက်သူများအဖို့ သွေးစွန်းနေ သည့်အရောင်၊ နမိတ်မကောင်းသည့်အရောင်ဟု အမြင်ကွဲလွဲသွားကြပါသည်။
ထို့အတူ အချို့က ဖြူစင်ခြင်း အဖြူရောင်ကိုသဘောကျသော်လည်း တချို့က အားနည်းသည့်အရောင် ဟုထင်မြင်ပြန်သည်။ ထိုကဲ့သို့ မိမိ၏ ဘ၀၊ မိမိ၏ စိတ်ခံစားချက်အပေါ်မူတည်ပြီး အရောင်အပေါ်အဓိပ္ပာယ် သတ်မှတ်ချက်တွေက မတူညီတတ်ကြပါ။
တချို့ကလည်း အရောင်ကို နိမိတ်အဖြစ်၊ သင်္ကေတများအဖြစ် သတ်မှတ်ကြပါသေးသည်။ အနက်ရောင်သည် အမင်္ဂလာ အရောင်၊ အစိမ်းသည် စိမ်းကားမှု၏ နိမိတ်၊ ကြည်ပြာရောင်သည် ချစ်ခြင်း၏ သင်္ကေတ စသည်ဖြင့် အမျိုးမျိုးယူဆတတ်ပါသည်။
မည်သို့ပင်ဆိုစေ အရောင်များနှင့် ကျွန်တော်တို့လွှတ်ကင်းနိုင်မည်မဟုတ်ပါ။ အဘယ့်ကြောင့် ဆိုသော် မိုးကောင်းကင်ကြီးသည် အပြာရောင်၊ ညကောင်းကင်သည် အမည်းရောင်၊ သဘာဝတောတောင်တို့ သည် အစိမ်းရောင် စသည့်စသည့် သဘာဝအရောင်တို့ဖြင့် ကျွန်တော်တို့ နေထိုင်နေကြရသည်၊ တွေ့မြင် နေကြရသည်မဟုတ်ပါလား။
(၅)
No Education is complete without Art Education. ပန်းချီအနုပညာမပါသည့် ပညာရေးဟာ ပြည့်စုံလုံလောက်သည့် ပညာရေးမဟုတ်ပါတဲ့။ ကျောင်းနေစဉ်ကတည်းက ပန်းချီ၏အခြေခံ အ၀ိုင်းလေးတွေ၊ လေးထောင့်လေးတွေ၊ တြိဂံလေးတွေဆွဲခဲ့ကြရပါသည်။ ထိုမှတဆင့် နှလုံးသားရဲ့ပန်းချီကားတွေအဖြစ်ရေးဆွဲ ကြပါသည်။
ပန်းချီကားတစ်ချပ်၊ အနုပညာတစ်ခုဆိုသည်မှာလည်း အရောင်တို့ဖြင့် ထုံမွှမ်းထားကြသည်ဖြစ်သည်။ အရောင်များကို ပိုင်နိုင်စွာအသုံးချနိုင်သည့်အခါ မဟာပန်းချီများဖြစ်လာကြသည်။ သရုပ်ဆောင်အနုပညာရှင် များသည်လည်း မျက်နှာအရောင်ချယ်သရခြင်း၊ ပြောင်းလဲရခြင်းဖြစ်သည်။ ကျရာအခန်းတွင် ကျရာအရောင်ကို ချယ်မှုန်းကြခြင်းဖြစ်သည်။ ထိုနည်းတူ စာရေးသည်ဆိုသည်မှာလည်း နှလုံးသား၏ အရောင်များဖြင့် တို့ထိရေး သားနေကြခြင်းဖြစ်ပါသည်။
ဤသို့ဖြင့် တချို့ချယ်သသောအရောင်တို့သည် လူအများချစ်ခင်ကြ၍ တချို့အရောင်တွေကတော့ လူမုန်းခြင်းကို ခံကြရပါသည်။ မိမိဘ၀အတွက် ဘ၀အရောင်ချယ်သ မမှားဖို့၊ အရောင်ရွေးမမှားဖို့ လိုပါ လိမ့်မည်။
(၆)
စိတ်ပညာရှင် အေဗရာဟင် မတ်စလို( Abraham Maslow)က အတ္တပုံဖော်ခြင်း ( Self -actulization) ကို လေ့လာတင်ပြခဲ့သည်။ သက်ရှိလူသားတို့ကို စေ့ဆော်နေသည့် အခြေခံအင်အားသည် အတ္တပုံဖော်ခြင်းဖြစ်သည်။ သက်ရှိသတ္တ၀ါတို့သည် ကြီးထွားဖွံ့ဖြိုးလာသည်နှင့်အမျှ မျိုးရိုးဗီဇ၏ သတ်မှတ်ချက် ဘောင်အတွင်း ဖြစ်ပေါ်လာသော စွမ်းအင်ပုန်းများကို တဖြည်းဖြည်းအကောင်အထည်ဖော်လာကြသည်။ ငါးတို့ ရေကူးခြင်း၊ ငှက်တို့မိုးပေါ်ပျံခြင်း၊ လူသားတို့လမ်းလျှောက်ခြင်းသည် မျိုးရိုးဗီဇမျှသာဖြစ်သည်။ ထိုအခြေအနေ များမှ လူတစ်ဦးသည် ကောင်းမှု၊ မကောင်းမှုကို ခွဲခြားလာခြင်း၊ ဘ၀တိုးတက်သည့် အပြုအမူ၊ အောင်မြင်မှု နည်းလမ်းများကို ရွေးချယ်အသုံးပြုလာခြင်းတို့သည် မိမိအတွင်းသဏ္ဍာန်ရှိ အတ္တအလိုက် ပုံဖော်လုပ်ဆောင် နေကြခြင်းဖြစ်သည်။
ဤသည်ကို တနည်းဆိုရသော် လူသားတစ်ဦး၏အစသည် အဖြူရောင်သက်သက်မျှသာဖြစ်သည်။ အသက်အရွယ်၊ လုပ်ဆောင်ချက်များပြားလာသည်နှင့်အမျှ ဘ၀အရောင်တို့သည် အမျိုးမျိုးကွဲသွားကြတော့ သည်။ မိမိ၏ အတ္တအရောင်အလိုက် ပုံဖော်ကြတော့သည်။
မတ်စလိုသည် "သမိုင်းတစ်လျှောက်တွင် ထူးချွန်ပြောင်မြောက်စွာ မိမိတို့၏ စွမ်းအင်ပုန်းများကို အပြည့်အ၀ဖော်ထုတ်နိုင်ခဲ့သူများကား အတ္တပုံဖော်သူများ ဖြစ်ကြသည် "ဟုဆိုခဲ့ပါသည်။ ထို့ပြင် စပိုင်နိုဇာ (Spinoxa) သောမတ်ဂျက်ဖာဆန်( Thomas Jefferson )၊ အေဗရာဟင် လင်ကွန်း(Abraham Lincoln )၊ ၀ီလျံဂျိန်း (William James)၊ အဲလဘတ်အိုင်စတိုင်း (Albert Einstein ) နှင့် အဲလီနာ ရုစဗဲ့ (Eleanor Rooservelt ) တို့၏ အတ္ထုပ္ပတ္တိများကို စုပေါင်းလေ့လာပြီးနောက် အတ္တပုံဖော်ပြီးသူများ ( Self-actualizer ) ဟူသော သမူဟ ရုပ်ပုံလွှာတစ်ခုကို ဖော်ထုတ်ခဲ့သည်။
မတ်စလို စုပေါင်းလေ့လာခဲ့သည့် ပုဂ္ဂိုလ်များသည်ကား သူတို့၏ ဘ၀အရောင်ကို အကောင်းဆုံး၊ အလှအပဆုံးဖြစ်အောင် ပြုလုပ်ဆောင်ရွက်သွားကြသူများ ဖြစ်တော့သည်။
(၇)
လိပ်ပြာလေးတစ်ကောင်က ပန်းပွင့်လေးတစ်ပွင့်အပေါ်ကိုနားလိုက်သည်။ ထိုလိပ်ပြာလေးသည် အရောင်အသွေးစုံလှပနေသလို သူနားလိုက်သည့် ပန်းပွင့်လေးသည်လည်း လှပနေသည်သာ။ လိပ်ပြာသည် သက်ရှိ ဘ၀တစ်ခုဖြစ်သည်။ ပန်းကလေးသည်လည်း ဘ၀တစ်ခုဖြစ်သည်။ သူ့နည်းသူဟန် အရောင်အသွေး များဖြင့် ဘ၀တွေက လှပနေပါသည်။
ကျွန်တော့်သမီးလေးက သူ့ဖန်တီးသည့် အိုးလေးကိုကြည့်ပြီး ပျော်နေပါလိမ့်မည်။ ဒီအချိန်လေးတွင် သူ့ဖန်တီးသည့်အိုးလေးသည် သူ့ဘ၀ဖြစ်ချင်ဖြစ်နေပါလိမ့်မည်။ သူချယ်သလိုက်သည့် အရောင်တို့သည်လည်း သူ့စိတ်ခံစားမှု အရောင်တွေဖြစ်နေပါလိမ့်မည်။
အနာဂတ်တွင် သူ့ဘ၀အရောင်ကို သူဘယ်လိုဆေးချယ်သမည်လဲ။ ဘယ်အရောင်တွေက သူ့ကို ကိုယ်စားပြုလျက် ထွန်းပကြမည်လဲ။
ကျွန်တော်သည်လည်း ကိုယ့်ဘ၀အတွက် အရောင်တွေကို ကိုယ့်အတွေ့အကြုံ၊ ကိုယ့်အသိတရား တွေမှ ရွေးချယ်ပါလိမ့်မည်။ ထိုအရောင်တွေဖြင့် ကိုယ့်ဘ၀ကို ချယ်မှုန်းပါလိမ့်မည်။ တစ်ခုပဲရှိသည် ကိုယ့်ဘ၀ အရောင်သည်ကား စိုပြေလှပနေဖို့တော့ လိုပါလိမ့်မည်။
**************
မောင်ပိုင်
၂၆-၁၀-၂၀၁၃